(Chr.) In nomine domini dei et salvatoris nostri Ihesu Christi. Hlodouuicus divina largiente gratia imperator augustus, omnibus episcopis, abbatibus, ducibus, comitibus, vicariis et cunctis fidelibus nostris, praesentibus scilicet et futuris. Notum sit magnitudini vestrae, quia vir venerabilis Hariolfus episcopus et abbas ad nostram accedens clementiam ostendit serenitati nostrae praeceptum ad relegendum, sibi a domno et genitore nostro Karolo imperatore adeptum, in quo continebatur, qualiter ipse in honore domini ac salvatoris nostri et sanctae dei genetricis semperque virginis Mariae, et sanctorum martyrum Sulpicii et Serviliani intra vvaldum cuius vocabulum est Uirgundia, in loco nuncupante Elehenuuang, in re proprietatis suae monasterium novo opere construxisset, in qua una cum monachis sibi subiectis regulariter vivere et consistere dinoscitur, atque omnes res suas, quae ex successione parentum ad eum legibus pervenerunt, vel ipse Christo propitio per emptiones, cessiones, donationes commutationesque, seu de quolibet adtracto adquirere potuit, et sua legitime fuisse possessio probatur, cum omni integritate ad eundem sanctum locum visus est delegasse. Quod monasterium cum omni integritate et soliditate sua, nemine contradicente ex parte heredum adfiniumque suorum, sed magis adsensum praebentes, illi tradere voluisset. Nos vero certi facti, tam ex lectione eiusdem praecepti, quam et confirmatione domni et genitoris nostri, placuit nobis una cum consensu episcoporum ceterorumque servorum dei nostrorumque fidelium, vel ad deprecationem antedicti Harialfi episcopi et abbatis, quia in regula sancti Benedicti legitur ut monachus nil proprium se habere audeat dicere, ut eum simul cum suprascripto monasterio et monachis inibi sub sancto ordine consistentibus, vel rebus ad ipsum sanctum locum iuste et rationabiliter pertinentibus vel aspicientibus, sicuti domnus et genitor noster fecerat, sub sermone tuitionis nostrae reciperemus, quod ita et fecimus, quatenus omni tempore sub sermone, nostra defensione atque sub emunitatis nomine quieto tramite vivere nobisque fideliter deservire debeant. Quapropter per praesentem auctoritatem nostram decernimus ac iubemus, ut nullus quislibet ex iudiciaria potestate in praefato monasterio sancti salvatoris et sanctorum martyrum Sulpicii et Serviliani seu curtis et villis vel agris ac reliquis possessionibus ad ipsum sanctum locum aspicientibus vel pertinentibus, ad causas audiendum vel freta exigendum, nec mansiones aut paratas faciendum, nec homines ipsius distringendum aut fideiussores tollendum, nec ullas redibitiones requirendum ingredere aut exactare, nec aliquid exinde abstrahere aut minuere contra rationis ordinem ullo umquam tempore poenitus praesumatur; sed sub emunitatis nomine, ut diximus, ac defensione nostra valeat saepe dictus Harialfus episcopus et abbas suique successores, qui fuerint rectores in ipso sancto loco, una cum rebus et hominibus ibidem pertinentibus, omni tempore quieto tramite vivere in dei servitio, ac partibus nostris fideliter deservire. Et quandoquidem abbas ex ipso monasterio de hac luce migraverit ad deum, si in ipsa congregatione talis fidei nostrae aptus repertus fuerit, qui secundum deum et regulam sanctam ipsam casam dei vel ipsos monachos regere et gubernare valeat, potestatem habeant inter eos eligendi abbatem, quatenus melius delectet ipsos servos dei, qui ibidem deo famulare videntur, pro nobis et coniuge nostra seu filiis et filiabus atque pro omni gente vel stabilitate regni nostri adtentius domini misericordiam exorare. Et ut haec a[u]ctoritas, nostris, deo haospice, futurisque temporibus inviolata, deo adiutori, valeat perdurare, manu propria subterfirmavimus, et de anulo nostro sub[t]ersigillari iussimus.

Signum (Monogramm.) Hludouuici gloriosissimi imperatoris.

(Chr.) Helisachar recognovi et subscripsi (Rekognitionszeichen) (Siegel).

Data VI. Idus Aprilis, anno primo, Christo propitio, imperii nostri. Indictione VII. Actum Aquisgrani palatio. In dei nomine [fe]l[icite]r am[en]

In nomine domini dei et salvatoris nostri Ihesu Christi. Hludowicus, divina ordinante providentia imperator augustus. Si petitiones sacerdotum ac servorum dei libenter audimus et eas nostrae mansuetudinis liberalitate ad effectum perducimus, id nobis procul dubio et coram deo ad aeternam retributionem pertinere confidimus. Proinde noverit omnium fidelium nostrorum prudentia, presentium scilicet ac futurorum, interveniente venerabile Haitone episcopo, qualiter presbiter quidam de Alamannia, nomine Engilbertus, servus noster, natus et nutritus in fisco nostro qui dicitur Scuzingauue, atque ordinatus in parochia Constantiensi, eo quod ipse iam senio confectus et infirmo corpore esse videbatur, suggessit nobis, ut pro nobis et pro stabilitate regni nostri et pro semet ipso, ut ei liceret propriolum atque omnem conquestum suum, quod ipse dato proprio pretio a liberis hominibus comparavit nec non a fiscalibus in fisco nostro commanentibus per loca determinata, id est, a fluviolo Mulibach usque in Chrumbenbach, deinde ad rivolum Richenbach et de illo usque in Fisbach, quod ipse situs est in fisco nostro, qui cadit in fluvium Scuzna, et ex utraque parte ripae eiusdem fluminis; hoc totum tradere concedimus ei ad venerabilem et sanctum locum quod dicitur Sindleoscesauua, et hac donatione sibi in eodem loco venerabili locum ad habitandum comparare. Cuius petitioni, quia iusta et ratio[nabilis] nobis videbatur, pro mercede nostra adsensum prebentes, has ei nostrae auctoritatis literas scribere iussimus, per quas vestram prudentiam certificare volumus, ut sciatis illum a nobis, licet ille servus noster fuisset, talem datam esse licentiam, ut predictum propriolum suum vel conquestum suum, quod est situm in pago Linzgauue, in territorio pertinente ad villam Duringa, potestatem habeat, solemniter facta traditione, ad illum venerabilem locum vel monasterium supra memoratum conferendi, ut pro hoc facto melius illum delectet et diebus vitae suae pro nobis et pro stabilitate regni nostri divinam exorare clementiam. Et ut certius credatis nostram hanc esse concessionem, de anulo nostro subter eam iussimus sigillari.

Ioseph ad vicem Helisachar recognovi et (subscr) . . . . rias anno secundo, Christo propitio, imperii nostri. Indictione nona. Actum Aquisgrani palatio regio in dei nomine felicite. Amen. Amen.

In nomine domini dei et salvatoris nostri Ihesu Christi, Ludovicus divina nos propitiante clementia imperator augustus. Si locis deo dicatis quipiam muneris conferimus, et imperialis munificentiae morem exequimur, et divinum per haec nobis favorem facilius conciliandum confidimus. Idcirco notum esse volumus cunctis fidelibus sanctae dei ecclesiae nostrisque, tam praesentibus et futuris, quia divino aucti amore monasterio Buchau nominata, quod constitutum est in honore sanctorum Cornelii et Cypriani, et situm est juxta lacum qui vocatur Phedersee, et quandam villam proprietatis nostrae sitam in centena Krecgow nuncupata, quae vocatur Maginga, et ecclesiam in villa quae appellatur Sulogau, cum terminis et omnibus ad se pertinentibus, videlicet curialibus aedificiisque, famulis et mancipiis ac terra salica, cultis et incultis, agris, campis, pratis, pascuis, sylvis, decimis, aquis aquarumque decursibus, molendinis, piscationibus, viis et inviis, exitibus et regressibus omnibusque usibus, magnis et parvis, ad easdem res iuste legitimeque pertinentibus, aeternaliter donamus. Constituimus quoque et confirmamus per nostrae authoritatis munitionem, ut nullus publicus iudex, neque dux, neque comes, aut quilibet ex iudiciaria potestate ecclesias, curtes, aut loca vel agros seu reliquas possessiones memorato monasterio praesenti tempore subiacentes, vel quae deinceps in ius et dominium eiusdem monasterii divinae pietatis augmento pervenerint, ad causas audiendas, vel freda exigenda, vel paratas faciendas, fideiussores tollendos, aut etiam homines, tam ingenuos quam et servos, super terram ipsius monasterii commorantes, distringendos, nec ullas rethibitiones vel bannos, aut illicitas occasiones requirendas, seu nullum placitum publicum habendum, nullis temporibus ingredi, vel ea quae supra memorata sunt, praesumat exigere. Et ut censales homines suae familiae, in quibuscunque locis sint constituti, pacem habeant, et coram nullo iudice regantur, aut bannum persolvant, aut saeculare negotium habeant, nisi coram abbatissa, vel ipsius monasterii advocato; sed liceat supradicti monasterii abbatissis sub dominicae immunitatis tuitione, quieto ordine omnia possidere. Advocatum autem, quos nescimus quales sint quandoque intrare, constituimus et nostra imperiali authoritate praecipimus, ut ipse advocatus in loco supra memorato nullum ius habeat placitandi, vel aliquam iudiciariam potestatem exercendi, nisi forte ab abbatissa vocatus advenerit, et tunc voluntati sive petitioni ipsius satisfecerit. Sumtus vero vel servitus tantum detur advocato ex parte abbatissae ad quemcumque locum advocatus cum semel in anno placitum habuerit et duodecim equos adduxerit, tantum honeste procuretur. Nullum placitum praeter voluntatem abbatissae usquam advocatus statuat. Quidquid placitando acquisierit duae inde partes erunt abbatissae, tertia advocati. Nullam domo dei servientem sine abbatissae vel ipsius consensu ad iudicium cogat. Nullum de familia sine iusta sociorum suorum deliberatione damnet vel coherceat. Nullum advocatum vel exactorem sibi constituat. Nihil privati muneris vel servitii a quolibet loco, sive curte, sive cellariis, quasi ex debito et statuto sibi iure exigat. Mansiones seu pernoctationes uspiam frequentare caveat. Quodsi ultra statutum nostrum et praeceptum in aliquo loco placitare voluerit, ipse de tertia sui parte ibidem sibi contingente provideat quod ad sumptum habere debeat, nisi forte aliqua de causa ab abbatissa illuc vocetur, a qua tunc decenter quod opportet sibi exhibeatur. Proinde si haec statuta quisquam advocatus obstinata audacia transgredi et infringere praesumpserit, centum libras auri optimi, medietatem palatio nostro, medietatem vero monasterio persolvat, et advocatia cum caeteris commodis iusta praevaricationis examinatione omni tempore careat. Quando autem domina et mater ipsius monasterii de hac luce migraverit, non aliunde veniens ibi abbatissa constituatur, sed ab ipsis sanctimonialibus, deinde a clero et populo, quam idoneam existere cognoverint, eligatur et constituatur; cui summopere interdicimus, ne aliquas res praefati monasterii cuiquam in beneficium concedat, vel aliquo modo ab usu sororum vel fratrum deo ibi famulantium alienare praesumat. Et haec ut nostrae concessionis authoritas perpetua obtineat vigorem, annulo nostro subter eam iussimus sigillari. Datum undecimo Kalendas Augusti, anno, Christo propitio, sexto imperii domni Ludovici piissimi augusti. Indictione duodecima. Actum Engelsheim palatio publico. In dei nomine fideliter Amen.

ego Adalboldo [...] per hanc epistolam donationis dono ad sanctum Cyriacum martyrem Christi, vel ad basilicam sancti Dyonisii, ubi sanctus Cyriacus in corpore requiescit, et est in pago Wormatiense prope Wormatiam civitatem, super fluvium Primma, ubi venerabilis vir, Bernharius episcopus, rector praeesse videtur. Hoc sunt ipsae res: basilica constructa in honore sancti Petri et Pauli, et quicquid ad ipsam ecclesiam aspicit vel traditum fuit et est in marca Bollinga vel in ipsa villa, id est, mansos indominicatos cum casis, aedificiis vel superpositis, et in ipsa marca vel in villa mansos XX cum servis super eos habitantibus. Tradidi quoque eidem ecclesiae in Dalaheim marca, in villa Hurbach seu in aliis locis circumiacentibus, in Scaflenza marca, in villa Hurbach plures mansos et quicquid ad eos pertinet in omni re, totum et ad integrum [...] Similiter et in alio loco dono in pago Zabranachgauue, in villa quae dicitur Zimbra, houbas IIII, cum hominibus habitantibus, et quicquid ad ipsas res pertinet. Et in alio loco dono in pago Gardachgauue, in villa quae dicitur Hetenesbach et est in ipsa marca super fluvium Nechar, id est, curte indominicata, cum omnibus appenditiis suis, mobilibus et immobilibus. In villa Nordheim dono vel trado mansos indominicatos cum domibus, [...]

Actum publice in villa Bollinga.

(Chr.) In nomine domini dei et salvatoris nostri Ihesu Christi. Hludouuicus divina ordinante providentia imperator augustus. Si liberalitatis nostrae munere locis deo dicatis aliquid conferimus, id nobis, et ad mortalem vitam feliciter transigendam, et ad aeternam perpetualiter obtinendam, profuturum liquido credimus. Idcirco notum fieri volumus omnium fidelium nostrorum, presentium scilicet et futurorum, solertiae, quia placuit nobis pro remedio animae nostrae, ut pius dominus peccaminum nostrorum maculas detergere dignetur, quoddam monasterium quod vocatur Gunzinhusir, super ripam fluminis Alchmuna constructum, in pago Sualofeld, cum cellulis et rebus sibi subiectis, de iure nostro in ius et potestatem cuiusdam monasterii quod vocatur Elehenuuang, cui venerabilis abba Sindoldus preesse videtur, more solempni, nostrae auctoritatis precepto tradere atque confirmare. Hoc itaque Gunzinhusir monasterium cum omnibus rebus ac possessionibus ad se ordine legitimo pertinentibus vel aspicientibus, quantumcumque de ratione eiusdem monasterii presenti tempore nostri iuris atque possessionis in re proprietatis est, totum et ad integrum vel inexquisitum praedicto venerabili Sindoldo abbati ad partem praescripti monasterii sui Elehenuuang per hanc nostrae auctoritatis donationem tradimus atque confirmamus. Ita videlicet, ut quicquid ab hodierna die et tempore rectores atque ministri monasterii Elehenuuang de praedicto Gunzinhusir monasterio, vel in ipsis rebus quae ad illud pertinent, pro oportunitate atque utilitate eiusdem monasterii facere voluerint, libero in omnibus potiantur arbitrio faciendi, habeatque idem Sindoldus abba et successores sui eandem potestatem illud ordinandi ac disponendi et iustam in eo atque religiosam dominationem exercendi, quam in ceteris rebus et possessionibus, ad ius vel potestatem monasterii sui, ubi sanctus Sulpicius et Servilianus martires corpore requiescunt, pertinentibus, habere cognoscit. Et ut haec nostrae auctoritatis donatio atque confirmatio firmior habeatur et tam nostris quam successorum nostrorum temporum inconvulsam atque inviolabilem obtineat firmitatem, manu propria eidem subscripsimus et de anulo nostro iussimus sigillari.

Signum (Monogramm) Hludouuici serenissimi imperatoris. (Chr.) Hirminmaris notarius ad vicem Fridugisi recognovi et subscripsi (Rekognitionszeichen) (Siegel).

Data XII. Kalendas Septembris, anno, Christo propitio, X. imperii domni Hludouuici piissimi augusti. Indictione prima. Actum Engilinhaim palatio regio. In dei nomine feliciter amen.

(C.) In nomine domini dei et salvatoris nostri Ihesu Christi. Hludouuicus divina ordinante providentia imperator augustus. Cum locis divino cultui mancipatis ob divine servitutis amorem opem congruam conferimus, et regiam morem decenter implemus, et id nobis profuturum ad aeternae remunerationis praemia cappessenda veraciter credimus. Igitur notum esse volumus cunctis fidelibus sanctae dei ecclesiae nostrisque, praesentibus scilicet et futuris, quia adiit serenitatem culminis nostri venerabilis vir Uulgarius, Uuirziburgensis ecclesiae episcopus, quae est constructa in honore domini et salvatoris nostri Ihesu Christi, [et] detulit obtutibus nostris duo praecepta domni et genitoris nostri Karoli, piae recordationis praestantissimi imperatoris. In unum continebatur, qualiter bonae memoriae Karlomannus quondam aliquas cellulas vel basilicas unacum adiacentiis vel appendiciis earum, per diversos pagos et loca ad ipsam ecclesiam delegasset, et postea domnus et genitor noster suo auctoritatis praecepto eandem largitionem ad praedictam sedem confirmasset. Id est, basilicam infra praedictum castrum in honore sanctae Mariae constructam, cum adiecentiis suis, basilicam in villa Naristagne in honore sanctae Mariae, et ecclesiam in villa Hengilonheim in honore sancti Remigii, et ecclesiam in villa Truciniacus, quae est constructa in honore sancti Martini. Suprascriptas enim basilicas sunt in pago Uuarmacense. Similiter in pago Morninse basilicam in villa, quae vocatur Autmundisstat, in honore sancti Petri principis apostolorum unacum appendiciis suis. et basilicam in pago Neccraugauginse, quae est constructa in villa quae dicitur Hlauppa in honore sancti Martini, cum adiecentiis. Seu et in ipso pago basilicam in villa Helibrunna in honore sancti Michahelis archangeli constructam, unacum appendiciis suis. Nec non et in pago Uuinegardisuueiba, in villa Burchaim basilicam in honore sancti Martini sitam cum omnia ad se pertinentia. et in pago Moligaugio, infra castro Stochamburg, basilica sancti Martini. In pago Dubragauginse basilicam in honore sancti Martini in villa Chuningashaoba cum adiecentiis eius. In [eodem] pago basila [corr. basilicam] constructa in villa quae vocatur Soagra ecclesiam sancti Martini. et in pago Hramgauginse in villa Uuinedisheim basilicam in honore sancti Martini. In pago Guligauginse ecclesiam in honore sancti Iohannis baptiste in villa Gullahaoba. et basilicam in villa Uueolendishaim in honore sancti Martini. et basilicam in iam dicto pago in honore sancti Remegii in villa Tornhaim. et basilicam in honore sancti Andree apostoli in villa Kyrchaim. et basilicam in ipso pago quae dicitur Ippihaoba, in honore sancti Iohannis baptiste. et in pago Folafeld basilicam similiter in honore sancti Iohannis in villa Herilindaim. et in pago Baddenagaugia basilicam in honore sancti Martini in villa Chuningishaoba. etiam basilica in villa Sunindrinhaoba in honore sancti Remegii. et basilicam in pago Graffeldi in honore sancti Martini in villa Achife[l]d. etiam in ipso pago basilicam in honore sancti Petri in villa quae vocatur Chuningishaoba. et in pago Uuistregaugio in villa Branda basilicam in honore sancti Martini. et in ipso pago in villa Madalrichistreuua basilicam in honore sancti Martini. et in pago Salaegaugia in villa Homolinburg basilicam in honore sancti Martini. et monasterium constructum in honore sanctae Mariae in villa quae vocatur Karloburgo cum omnibus ad se iuste et legaliter pertinentibus vel aspicientibus. Continebatur etiam in alio praecepto eiusdem domni et genitoris nostri, qualiter inspectas donationes sive traditiones per quas ipsa ecclesia ditata erat confirmasset, ut quicquid praedictus Karlomannus sive bonae memoriae domnus Pippinus rex et reliqui deo timentes homines ad ipsam ecclesiam delegassent, tam in rebus et marchis ac decimis, necnon et de pagensium vel heribannis perpetuo pars ecclesiae per easdem largitiones possideret. Sed pro huiusce rei firmitate petiit clementiam nostram, ut paternae auctoritate nostram quoque iungeremus auctoritatem. Cuius petitioni libenter adquievimus, atque ita circa praedictam sedem concessisse alque confirmasse omnium fidelium nostrorum cognoscat magnitudo. Praecipientes ergo iubemus, ut, quemadmodimi constat a praedictis principibus ac reliquis catholicis viris eidem ecclesiae conlatum et a domno et genitore nostro per easdem auctoritates confirmatum, ita omni tempore per hanc nostrae auctoritatis confirmationem rectores et ministri praedictae sedis legaliter teneant atque possideant et faciant quicquid utilitati praedictae sedis congruerit. et ut haec auctoritas nostris futurisque temporibus domino protegente inviolabilem atque inconvulsam obtineat fimitatem et a fidelibus sanctae dei ecclesiae et nostris verius certiusque credatur, manu propria subter firmavimus et anuli nostri inpraessione signari iussimus.

Signum (M.) Hludouuici serenissimi imperatoris. Durandus diaconus ad vicem Fridugisi recognovi et subscripsi [Recogn. Zeichen mit tironischen Noten] [Siegel].

Data XIIII. Kalendas Ianuarias, anno, Christo propitio, VIIII. imperii domni Hludouuici, piissimi augusti. Indictione prima. Actum Francunofurt palatio. In dei nomine feliciter Amen.

In nomine domini dei et salvatoris nostri Ihesu Christi. Hludouuicus divina repropitiante clementia imperator augustus. Notum sit igitur omnibus fidelibus nostris, praesentibus scilicet et futuris, quia nos pro cumulo mercedis nostrae concedimus cuidam monasterio, noncupatum Sindleozesauua, monachisque inibi deo iugem exhibentibus famulatum, quibus Uualafridus abba praeesse dinoscitur, quandam partem census seu tributi, quae nobis annuatim ex Alamannia persolvebantur, videlicet ex centena Eritgaouua noncupatam et ex ministerio Chuonradi comitis, nec non et decimam de portione ministerii, quod Raban comes habet, quod pertingit finibus Alamannicis sub eoa; seu et nonam ex fisco cuius vocabulum est Sarbach; atque etiam et nonam partem tributi, quae ex Brisachgaouue ad nostrum exigitur opus. Haec autem superius conprehensa pro emolumento animae nostrae ad idem monasterium contulimus, quatenus monachi stipendium necessarium habentes pro nobis alacrius domini misericordiam exorare procurent. Sed et statuentes precipimus, ut none atque decimae, quae pro nostra eleimosina praedicto contulimus monasterio, primo, antequam summa censuum et tributorum dispertiatur, agentibus monasterii dentur, et postmodum fiat divisio partium, quę ad nostrum vel comitum nostrorum ius pertinere debent. Pro firmitatis quidem gratia hos nostros imperiales fieri iussimus apices, per quos precipimus atque iubemus, ut praefatus census atque tributum nonę et decimae absque cuiusquam retractione aut diminoratione monachis in memorato monasterio degentibus iuxta nostram concessionem haberi permittantur, nullaque subtractio aut insultatio eis a quoquam successorum nostrorum inferatur; sed liceat eis per tempora labentia eisdem nostris munificentiis libere frui, ac per hoc liberius pro nostris excessibus domini misericordiam implorare. Et ut haec largitio nostris et successorum nostrorum temporibus firma et stabilis permaneat, de anulo nostro subter eam iussimus sigillare. Signum (Monogramm) domni Hludouuici imperatoris.

(Chr.) Daniel notarius ad vicem Hugonis recognovi et subscripsi (Rekognitionszeichen) (Siegel).

Data XII. Kalendas Iulias, anno, Christo propitio, XXVI. imperii domni Hludouuici piissimi augusti. Indictione II. Actum Uuormacia civitate. In dei nomine feliciter amen.